انت نازل تعمل ايه يوم ٢٥ يناير؟

انت نازل تعمل ايه يوم ٢٥ يناير؟

عيش، حرية، عدالة إجتماعية!

نكتفي بالعيش؟ لو إكتفينا بالعيش هنكون (في اسوء الحالات) عبيد او في أحسنها حيوانات أليفة.

نكتفي بالحرية؟

مينفعش. لان بدون عدالة إجتماعية مش هنتحاسب زي بعض. و القانون مش هيحكم بالعدل بيننا.

الثورة قالت من اولها – مجلس رئاسي وطني.

و دلوقت الناس بتقول – مجلس شعب.

مال ده و مال ده؟

انت نازل تعمل ايه يوم خمسة و عشرين؟

حلول الوسط لا يجب ان تُستخدم فوق الأنهار و الفجوات – لأنك لما بتبني كوبري لو بنيت نصه – بدل ما تحصل على نصف مطلبك – هتلاقي نفسك في قاع النيل.

مجلس الشعب – على درجة اقل من الحاكم – و يريد البعض ان يرفعه الى درجة الحاكم و المشرع في نفس الوقت و ينسى الناس جميعاً ان كل هذه المسارات خاضعة لإرادة المجلس العسكري و إن كان الضغط الشعبي قد يكون له تأثير – طالما لا يتعدى على المصالح.

كله لعب في ميه أثبتت مرارا – انها عكره.

دوائر مغلقة.

الفرق الكبير جداً بين مجلس رئاسي و مجلس الشعب هو ان مجلس الشعب مبني على التنافس. من اليوم الاول و من منطلق ‘السياسة’ – وضعنا المجلس العسكري في حالة منافسة و مش توافق. و إحنا لعبنا اللعبة و رحنا الإستفتاء و لعبنا نفس اللعبة و معظمنا راحوا الإنتخابات و نسينا كلنا ان الإنتخابات معناها ان واحد بيكسب و الثاني بيخسر، او ان واحد يكسب و كتير يخسروا.

فين الميادين من ده؟

مصر اللي عايزينها جميلة. حلوة فعلا – في مصرنا – كل واحد واقف جنبك قلبه عليك، بدون إعتبارات إجتماعية او سياسية او دينية. مصر اللي عايزينها حلوة بجد – فيها كل الناس و مفيهاش أعداء.

لازم كيان مبني على التوافق، مش المنافسة. اي حد بيتنافس في المرحلة دي تعرف انه ما زال بيلعب لعبتهم. البرادعي زهق من لعبتهم.

أنا عارف الردود -

١) إحنا كلنا فكرنا في مجلس رئاسي بس الرائ العام ضدها!

الرائ العام كان مع المحاكمات العسكرية. بعد حملة طويلة عرفت أخيرا توصل صوتها بقوة في الاعلام – الرائ العام اتغير.

الى الان لم ارى اي حملة قوية للمقترح ده – رغم ان معظمنا – عارفين ان ده احسن حل، الحل الوحيد النظيف.

٢) هنرجع ثاني لخط البداية!؟

لا. و دي فكرة مش مقبولة – ده غير اننا منقدرش.

إحنا مش المفروض داخليين على إنتخابات؟ جميل. بدل ما ننتخب رئيس جمهورية – ننتخب مجلس رئاسي مدني يمثل جميع طرائف (مقصودة – الكلام كله جد أوي) المجتمع المصري.

اسهل حل هو اننا نعمل انتخابات الجلس الرئاسي في وقت ما كنا ناويين نعمل إنتخابات الشورى او بدل إنتخابات الرئاسة.

٣) ليه مش رئيس و خلاص؟

بص على مصر دلوقت – و قارنها بمصر اللي انت عايزها. اللي انت عايزها بجد.

المسؤلية التأسيسية أثقل بكثير من المسؤلية الإدارية!

٤) هنختارهم ازاي؟

تختار ليه؟ خدهم كلهم! او على الاقل انتخب معظمهم! مصر محتاجة مجلس رئاسي تأسيسي ينتخب من المرشحي الكبار – و لكن ببعض الكوتات – لازم يكون فيه حد من القضاء، لازم يكون في دكتور، لازم يكون في ممثل للإخوان المسلمين، و للسلفيين، و للعلمانيين او الليبراليين و الإشتراكيين، لازم يكون في على الاقل امرأة – و ده كده و إحنا عارفين انهم اكثر من ٥٠ من الشعب!

٥) كده كثير أوي! 

المجلس العسكري في كام؟ ٢٠؟ ١٩؟ و كلهم لوائات. نوصل إحنا لعدد ما بين عشرة او عشرين.

٦) هيتخانقوا مع بعض على طول!

اولا – إحنا مش عيال و القادة السياسيين لو عيال يبقى ننسى مصر و نروح كلنا نقعد في بيوتنا.

ثانيا – و ده الأهم – هيكون في المطلق عندهم مهام محددة جداً (هقترحم دلوقت) – فلو إختلفوا يبقى بيتلكعوا بلا عذر او بيتناقشوا في حاجة عبثية من دون مستواهم.

لازم يشتغلوا بمنطق الإجماع – حكم الأغلبية مش في التأسيس!

٧) هيدوروا على مصالحهم!

زي ما قلت – هيكون لهم اهداف محددة (اهداف الثورة) – و خطوات محددة (جايلك في الكلام..) – و هيكون شرط ان من يقبل منصب في المجلس لا يحق له الترشيح في الفترة الرئاسية التالية.

و بكدا هنضمن ان بتوع الكراسي يشاوروا عقلهم.

المهام الأولية للمجلس الرئاسي التأسيسي -

١) اعادة هيكلة الجهاز الامني.

٢) اعادة هيكلة الأجور.

٣) الاشراف على و إنهاء محاكمات النظام السابق و محاكمات قتلة الشهداء.

٤) الاشراف على اللجنة الدستورية و إعداد دستور توافقي.

٥) استرداد الاموال المنهوبة.

٦) تكوين صندوق لشهداء الثورة و المصابين و عائلاتهم.

٧) عمل نصب تذكاري تمجيدا للثورة و للشهداء و المصابين.

و نستعيد الأمن و ننسى الاستقرار و نبدأ في التغيير و التطور (بجاحة، أنا عارف)…

نقعد كده سنتين – و بنبي مصر جديدة.

أنا نازل علشان عايز مجلس تأسيسي بصلاحيات رئاسية – علشان نشتغل على نظافة.

لازم مرحلة تأسيسية توافقية.

انت نازل تعمل ايه يوم ٢٥ يناير؟